På oppdrag frå Sogn og Fjordane fylkeskommune har Menon utarbeidd ein rapport om vandring og reiseliv. Menon skulle undersøke om vandring har potensiale til å vere eit berande produktkonsept for reiselivssatsinga i fylket fram mot 2025. I tillegg skulle ein sjå på kva for type tilrettelegging og infrastruktur det er behov for dersom vandring skal bidra til måla om auka verdiskaping og sesongutviding. Rapporten skal brukast i arbeidet med implementering av reiselivsplanen i Sogn og Fjordane, slik at fylkeskommunen kan disponere reiselivsmidla til målretta og effektive tiltak.
Vandrefylket Sogn og Fjordane
Menon si vurdering er at det er eit unytta potensiale innan vandring i Sogn og Fjordane. Fylket har mange spennande produkt og unike turkonsept som gjennom ei forsterka satsing kan løftast til nye nivå. Satsinga går hand i hand med arbeidet til Fjord Norge og NCE Tourism Fjord Norway. Fokuset må vere på det unike ved vandring i Fjord Norge, dvs. vandring i fjordlandskap, og det unike ved vandring i Sogn og Fjordane, som ligg i den store variasjonen i landskapet med fjell, fjord, fossar, kyst og kulturminne. Menon peikar på fleire turkonsept som dei meiner har stort marknadspotensiale; brevandring, via ferrata, kystvandring, fossevandring, kulturvandring, fjordvandring, toppturar og kombinasjonar av vandring og f.eks. fjordcruise, kajakk eller ribbåt. Men på produktsida er det fleire faktorar som må vere på plass for å få til ei vellykka satsing. Destinasjonane må ha aktørar som torer å satse på utvikling av lønsame og berekraftig produkt. Her meiner Menon at vandresatsinga i Sogn og Fjordane framleis er tidlig i livssyklusen, og at det er behov for betre produkt- og konseptutvikling, kommersialisering, marknadskommunikasjon og profesjonalisering. Sterkare nettverk og samarbeid om produktpakkar blir også dratt fram som eit suksesskriterium.
Kva er ein god vandredestinasjon?
God tilrettelegging med merking av turløyper som har varierande vanskegrad, er ein føresetnad for å bli ein god vandredestinasjon. Det må også vere tilgang på kommersielle tilbydarar som kan kapitalisere og ta ut tilleggsverdiar på vandretilbodet gjennom guiding, transport, overnatting, servering osv. Informasjonen til vandreturistane må vere tilpassa deira behov, og det er viktig at servicen og vandreprodukta held svært høg standard, slik at prisnivået kan forsvarast. Tematuristen er betalingsvillig, men det er heilt avgjerande å innfri dei høge forventningane om kvalitet i alle ledd. Her har NCE Tourism Fjord Norway sett fokus på nokre viktig punkt gjennom arbeidet med sjekklister for vandrevennlige destinasjonar (Hikers Welcome).
Menon peikar på logistikk som ei av dei store utfordringane i Sogn og Fjordane. Dette gjeld både tilgangen inn til fylket, men også transport innad i fylket der dei nemner shuttlebussar frå overnattingsstadane til start- og sluttpunkt for turane som eitt mulig tiltak.
Vandresatsinga i Nordfjord
I Reisemål Stryn & Nordfjord har vi jobba aktivt med vandring i mange år, og vi meiner at Nordfjord har attraktive produkt som gjer at regionen kan ta ein leiande posisjon som vandredestinasjon, nettopp fordi Nordfjord i særlig stor grad kan vise til kombinasjonen fjord, bre og fjell innanfor relativt korte avstandar. Med eit kystlandskap som også er godt eigna for vintervandring, kan Nordfjord faktisk tilby vandring året rundt.
Dei siste åra har RS&N hatt spesielt fokus på betre tilrettelegging av turløyper. Med støtte frå Gjensidigestiftinga har vi fått sjansen til å dra i gang ei storstilt satsing på merking og gradering i samsvar med den nasjonale standarden. RS&N koordinerer arbeidet i Nordfjord og samarbeider tett med dei seks kommunane, samt lag og organisasjonar. Det er mange involverte og mykje frivillig arbeid som blir lagt ned for å få skiltinga på plass. Prosjektet vil gi store positive ringverknadar til reiselivsnæringa og innbyggarane i regionen. Betre informasjon og tilrettelegging gjer at dei fantastiske turstiane i området vårt blir meir tilgjengelege, og fleire vil kome seg ut på tur, både fastbuande og tilreisande. Vi utviklar her eit fellesgode som heile regionen vil nyte godt av; innbyggarar og tilflyttarar i form av auka bukvalitet, bulyst, trivsel og folkehelse; reiselivsnæringa i form av produktutvikling som vil gjere Nordfjord til eit meir attraktivt reisemål. Etter kvart som skilta begynner å kome opp, får vi mange positive tilbakemeldingar frå brukarane. Løypenetta på Harpefossen og Turløyper Stryn er så godt som ferdig skilta, og arbeidet med øvrige løyper er i rute. Akkurat no er vi i innspurten med søknad til tredje tildelingsrunde, og vi håpar å kunne merke endå fleire turstiar, til glede både for nordfjordingane og besøkande til regionen. Vi ser at dette er eit prosjekt som har positiv effekt på samarbeidet i Nordfjord og er med på å setje fokus på utviklinga av Nordfjord som region.
Eit anna stort tilretteleggingsprosjekt har vore utbetringa av stien opp til Skåla i Loen. Skåla er eit fyrtårn for reiselivet i Nordfjord og i heile Fjord Norge-regionen. Fjellet med det karakteristiske tårnet på toppen blir eit stadig meir populært turmål, noko også oppslutninga om motbakkeløpet Skåla Opp vitnar om. For 2013 var konkurranseklassa fullteikna allereie i november 2012. Den stadig aukande interessa for turen til Skåla er også bakgrunnen for at ein starta Skålastiprosjektet. Det blei etter kvart stor slitasje i terrenget og mange parallelle stiar. Alle tiltak som er gjennomført i løpet av prosjektperioden, gjer stien betre rusta til å tåle all vandretrafikken. Store delar av Skålastien ligg i Jostedalsbreen Nasjonalpark. Friluftsliv er eitt av verneformåla, og det har difor vore viktig å legge til rette for at folk kan bruke stien.
RS&N har også bistått Loen Active i etableringa av eit heilt nytt tilbod i Nordfjord, nemlig via ferrata. Klatrestigen i Loen opna sommaren 2012 og har allereie gode besøkstal. Ikkje minst er det også blitt ei populær turrute for lokalbefolkninga – nok eit eksempel på at reiseliv- og lokalsamfunnsutvikling ofte er to sider av same sak.
Den nyaste satsinga vår er eit turkonsept der vi vil løfte fram dei beste turane i Nordfjord som på ulike måtar viser regionen sine særtrekk og unike kvalitetar. Kvar av turane vil garantert gi deg ei magisk oppleving – enten på høge toppar som tek pusten frå deg, langs den eksotiske kysten eller på historiske vegar. Til saman representerer turane mangfaldet og spydspissane blant vandreturane i Nordfjord. Noko meir røper vi ikkje foreløpig, men følg med når vi lanserer konseptet seinare i vår.
God informasjon er dratt fram av Menon som ein viktig faktor om ein skal lykkast med å bli ein god vandredestinasjon. RS&N har lenge vore opptatt av å betre tilgangen på turinformasjon, bl.a. gjennom arbeidet med turkart. Vi har no stadig meir fokus på dei digitale kanalane og jobbar målretta med vandresidene på nordfjord.no, inkludert implementering av nytt turstisøk og tilpassing til nye digitale flater.
Menon sin rapport kan du laste ned her.
Sjå også Reiselivsplanen til Sogn og Fjordane fylkeskommune.
